دیلیمی ، یوردومو ، دینیم کیمی مقدس بیلیره م ...
موسیقی نشئه سی مین سوگیلی جانانه دگر
اثر ناله نی عارف ایچون جانه دگر
موسیقی اهلینه انصاف ایله قیمت قویماق
لحن داود ایله مین تخت سلیمانه دگر
بیخبرلر نه بیلیر لهجه خواننده نه دیر
اهل حال اولسا ، بو سؤز قدرده میلیانه دگر
پرده غم داغیلیر تاره دگنده مضراب
طره دلبره هردم نئجه کی شانه دگر
موسیقیله اولار هر خسته یه عالمده علاج
بو طبابت نئچه مین چاره لقمانه دگر
بیزه بو علم حرام اولموش ایدی کئچمیشده
یعنی شیطان ایشی دیر ، رخنه سی ایمانه دگر
یاشاشین قرمزی شهرتلی وطن قانونی
بوسخاوت نئچه مین حاتم دورانه دگر
قیلدی هر یئرده بنا موسیقی مکتب لرینی
نغمه نین فایده سی ایندی هر انسانه دگر
خلقیمیز موسیقی علمین اوخویور مین لر جه
ئولکه میزچون بو شرف مهر درخشانه دگر
موسیقیله منی دفن ایله سه لر واحد اگر
قبریمین تورپاغی مین روضه رضوانه دگر

کیمده واردیر گؤزلیم سنده اولان جاذبه لر
سنه دنیاده مگر عاشق اولا ندا غم ائلر ؟
بس دیر اولدورمه یه جکسن گؤزلیم دنیانی
هر یوزی گؤیچک اولا ندا بوقدر چم خم ائلر
اینجیمه گؤز یاشیم آخسا سنی گؤردوکده گولوم
گول آچیل دیکده باهار فصلی بولود شبنم ائلر
ناز و غمزه ن ، یئریشین ، شوخ باخئشین عالم دیر
بیرده زولفون اوزه توکسؤن اودا بیر عالم ائلر
حیف سن گزمه یاراشماز سنه بیگانه ایله
او آچیب سرینی دونیایه سنی محرم ائلر
واحدم عمرومو من عشقیله صرف ایله میشم
عشق یا اؤلدورر آخیر یا منی آدم ائلر

گؤزللر ایچره سن ای ماهپاره بیردنه سن
گؤزل لرین گؤزو سن ، زلفی قاره بیرد نه سن
گؤل اؤزلی نازلی صنم لر دوشر قدم لرینه
بو چشم مست ایله قیلسان اشاره بیرد نه سن
سن اولماسان منی هجران غمی هلاک ائیلر
شکسته کونلومه عالمده چاره بیرد نه سن
زمانه اهلینه مشهورسان گؤزل لیکده
بو سر گیزلی دگیل ، آشکاره بیرد نه سن
او ذوقی دولت دنیایه وئرمه رم هردم
من فقیره ده قیلسان اشاره بیرد نه سن
گؤزل حیاتینی واحد فنایه صرف ائتمه
سنی زمانه یئتیرمز دوباره بیرد نه سن

ایسته رم من او گولی اؤز گول خندانیم اولا
اودا ئوز کونلونی وئرسین منه جانانیم اولا
تک جانانیله بیر یئرده گونوم خوش گئچسین
آرزو ایله مه رم باغ گلستانیم اولا
قیمییان جانینه عاشق دگیل اؤز یاری ایچون
من فدا ایلیه رم یاریمه مین جانیم اولا
گونده مین یول ائده رم جانیمی قوربان او گؤله
اودا بیر یول دولانیب باشیمه قوربانیم اولا
بو پری چهره لرین بیرجه گؤزل لیک لری وار
سومه رم هئچ بیرین الده اگر امکانیم اولا
نیله ییم کؤنلومه بیر قویماده آسوده اولام
گؤروم ای کاش کی ویران دل سوزانیم اولا
واحد هر شوخه ایناندیم سا وفاسیز چئخدی
بو گؤزل لرله منیم حشرده دیوانیم اولا